ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

ເປຕັງ ນາຍົກ       ທ້າວ ພຸດທະລາ ແກ້ວກັນນິກາ ແລະ ທ້າວ ກຸມມານ ຫຼ້າດວງພິລາ ຈາກສະໂມສອນເປຕັງ ສວນອາຫານ ຕາດຖໍ້າເສືອ ປະກາດສັກດາໂຊຟອມເກັ່ງເອົາຊະນະ ທ້າວ ພອນປະເສີດ ສຸຂະຜົນ ນັກກິລາທີມຊາດ ແລະ ທ້າວ ອຸ່ນແກ້ວ ຫຼຽນແກ້ວ ອະດີດທີມຊາດ ຈາກແຂວງບໍ່ແກ້ວ ໄປແບບຂາດຮອຍ 13-5 ຄະແນນ ໃນຮອບຊີງຊະນະເລີດ ປະເພດຄູ່ຊາຍ ຄວ້າແຊ໋ມການແຂ່ງຂັນກິລາເປຕັງ ທົ່ວປະເທດ ຄັ້ງທີ 9 ຊີງຂັນພະນະທ່ານນາຍົກລັດຖະມົນຕີແຫ່ງ ສປປ ລາວ ປະຈຳປີ 2017 ໄປຄອງ. ຂະນະທີ່ ສະໂມສອນ ກະຊວງປ້ອງກັນຄວາມສະຫງົບ ຫຼື ປກສ ກວາດແຊ໋ມທັງປະເພດດ່ຽວຍິງ ແລະ ຄູ່ຍິງ ໄປຄອງ.

          ເມື່ອວັນທີ 31 ມີນາ ຜ່ານມາ ທີ່ສະໜາມກິລາ​ເປ​ຕັງ​ແຫ່ງ​ຊາດ ວິທະຍາ​​ເຂດ​ດົງ​ໂດກ ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ​ໄດ້​ມີ​ພິທີ​ປິດ​ການແຂ່ງຂັນກິລາ​ເປ​ຕັງ​ທົ່ວ​ປະ​ເທດ ຊີງ​ຂັນ​ພະນະ​ທ່ານ​ນາຍົກລັດຖະມົນຕີ ໂດຍ​ໃຫ້​ກຽດ​ເຂົ້າ​ຮ່ວມ ແລະ ມອບລາງວັນຂອງ​ ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີ ກະຊວງ​ສຶກສາ​ທິການ ລະ ກິລາ (ສສກ) ທັງ​ເປັນ​ຮອງ​ປະທານ​ຄະນະ​ກຳມະການ​ໂອ​ແລມປິກ​ແຫ່ງ​ຊາດ​ລາວ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງ ສສກ, ທ່ານ ຄຳ​ຫຼ້າ ວິນ​ໄລ​ທອງ ປະທານ​ສະຫະພັນກິລາ​ເປ​ຕັງ​ແຫ່ງ​ຊາດ​ລາວ ແລະທ່ານ ຈັນສະໝອນ ຜ່ອງ​ຈັນທາ ຫົວໜ້າ​ຝ່າຍ​ການ​ຕະຫຼາດ​ ບໍລິສັດ ​ເບຍ​ລາວ ຈຳກັດ ພ້ອມ​ດ້ວຍ​ບັນດາ​ຄະນະ​ບໍລິຫານ​ງານ​ສະຫະພັນ​, ກອງເຊຍແຕ່ລະແຂວງ, ກະຊວງ ແລະ ສະໂມສອນ​ເຂົ້າ​ຮ່ວມ.

          ການແຂ່ງຂັນລາຍການດັ່ງກ່າວ ດຳເນີນໃນລະຫວ່າງວັນທີ 29-31 ມີນາ ຜ່ານມາ ເຊິ່ງມີນັກກິລາເຈົ້າຮ່ວມ 300 ກວ່າຄົນ ຈາກ 14 ​ແຂວງ, 1 ນະຄອນຫຼວງ​ວຽງ​ຈັນ, 8 ກະຊວງ ​ແລະ 3 ສະ​ຖາ​ບັນແລະ ມີ​ການ​ຊີງ​ໄຊ​ກັນ​ທັງ​ໝົດ 5 ລາຍການ ປະກອບ​ມີ ປະ​ເພດ​ດ່ຽວ​ຍິງ ມີ 12 ຄົນ, ດ່ຽວຊາຍ 55  ຄົນ, ຄູ່​ຍິງ 9 ທີມ, ຄູ່ຊາຍ 52 ທີມ ​ແລະ ຄູ່​ອາວຸ​ໂສ50 ປີ ຂຶ້ນໄປ ມີ 20 ກວ່າທີມ. ຜ່ານການແຂ່ງຂັນນັດຊີງຊະນະເລີດ ປະເພດຄູ່ຊາຍ ລະຫວ່າງທີມສວນອາຫານຕາດຖໍ້າເສືອ ພົບກັບ ແຂວງບໍ່ແກ້ວ ຄູ່ນີ້ ມີແຟນພັນແທ້ກິລາເປຕັງເຂົ້າຮ່ວມຊົມຫຼາຍຮ້ອຍຄົນ ພໍແຕ່ການແຂ່ງຂັນເລີ່ມຂຶ້ນບໍ່ພໍທໍ່ໃດລ່ອງ ສອງນັກກິລາເປຕັງຈາກ ສວນອາຫານຕາດຖໍ້າເສືອ ກໍ່ອອກລາຍໂຊຄວາມແມ້ນ ແລະ ລີ່ລາການເຂົ້າບຸ້ນເອົາແຕ້ມໄດ້ຢ່າງເໜືອຊັ້ນ ເກັບຄະແນນຢ່າງເປັນກອບເປັນກຳອອກນຳຫ່າງໄປກອນເຖິງ 9-3 ຄະແນນ. ແນວໃດກໍ່ຕາມ,​ ສອງນັກກິລາບໍ່ແກ້ວ ບໍ່ຍອມແພ້ສູ້ສຸດຄວາມສາມາດອາໃສປະສົບການທີ່ເຄີຍເວທີລະດັບຊາດດີກຣີແຊ໋ມລະດັບອາຊຽນ ແກ້ເກມດ້ວຍການຕີບຸ້ນຄູ່ແຂ່ງຂັນທີ່ເຂົ້າຈອດເກືອບຕິດໝູ ແຕ່ທ້າວ ອຸ່ນແກ້ວ ຫຼຽນແກ້ວ ກໍ່ສາມາດຕີໄດ້ເຖິງ 3 ຈອດ 1 ແລະ ສາມາດບີບມືຕີຂອງຄູ່ແຂ່ງໄດ້ ຈຳເປັນຕ້ອງເຂົ້າ ເພື່ອແກ້ເກມ ແລະ ກໍ່ເຮັດໄດ້ດີສົ່ງຜົນໃຫ້ ພອນປະເສີດ ຕ້ອງຕີໄລ່ສາມາດເກັບຄະແນນຈີ້ຫຼັງ 4 ແຕ້ມ ລວມເປັນ 5-9 ຄະແນນ. ແນວໃດກໍ່ຕາມ, ໃນລ່ອງຕໍ່ມາສອງນັກກິລາ ສວນອາຫານຕາດຖໍ້າເສືອ ກໍ່ມາເຂັ່ນຟອມເກັ່ງໄລ່ເກັບຄະແນນທີ່ເຫຼືອ 4 ແຕ້ມ ຊະນະ ນັກກິລາຈາກແຂວງບໍ່ແກ້ວ ລວມເປັນ 13-5 ຄະແນນ ຄວ້າແຊ໋ມລາຍການນີ້ເປັນສະໄໝທຳອິດໃຫ້ແກ່ສະໂມສອນດັ່ງກ່າວໄປຄອງ ຢ່າງສົມສັກສີ.

          ສ່ວນຜົນການແຂ່ງຂັນອີກ 4 ລາຍການ ແຊ໋ມປະເພດດ່ຽວຍິງ ທີ 1 ແມ່ນ ປກສ1, ທີ 2 ແຂວງໄຊຍະບູລີ ແລະ ທີ 3 ປກສ2; ປະເພດຄູ່ຍິງ ທີ 1 ຕົກເປັນຂອງ ປກສ1, ທີ 2 ຮ້ານອາຫານໜອງປຸ໋ຍ ແລະ ທີ 3 ປກສ2; ດ່ຽວຊາຍ ທີ 1 ກະຊວງໂຍທາທິການ ແລະ ຂົນສົ່ງ, ທີ 2 ແຂວງຫຼວງພະບາງ ແລະ ທີ 3 ຮ້ານອາຫານໜອງປຸ່ຍ. ຂະນະທີ່ ຮຸ່ນອາວຸໂສ ທີ 1 ສະໂມສອນບ້ານດອນຝ້າຍ1, ທີ 2 ແຂວງບໍລິຄໍາໄຊ ແລະ ທີ 3 ສະໂມສອນບ້ານດອນຝ້າຍ2.

ຂະນະທີ່​ລາງວັນຊະນະ​ເລີດ ປະ​ເພດ​ດ່ຽວ​ຍິງ​-ຊາຍ ​ແລະ ທີ​ມຄູ່​ອາວຸ​ໂສ ທີ 1 ໄດ້​ຮັບ​ຫຼຽນ​ຄຳ ​ພ້ອມ​ເງິນສົດ 1,5 ລ້ານ​ກີບ, ທີ 2 ຫຼຽນ​ເງິນ ​ແລະ ​ເງິນ​ລາງວັນ 8 ​ແສນ​ກີບ, ທີ 3 ໄດ້​ຮັບ​ຫຼຽນ​ທອງ ພ້ອມ​ເງິນ 5 ​ແສນ​ກີບ; ປະ​ເພດ​ທີ​ມຄູ່​ຍິງ ທີ 1 ໄດ້​ຮັບ​ຫຼຽນ​ຄຳ ​ພ້ອມ​ເງິນສົດ 2 ລ້ານ​ກີບ, ທີ 2 ຫຼຽນ​ເງິນ ​ແລະ ​ເງິນ​ລາງວັນ 1 ລ້ານກີບ ​ແລະ ທີ 3 ​ໄດ້​ຮັບ​ຫຼຽນ​ທອງ ພ້ອມ​ເງິນ 5 ​ແສນ​ກີບ ​ແລະ ປະ​ເພດ​ທີ​ມຄູ່​ຊາຍ ທີ 1 ​ໄດ້​ຮັບ​ຫຼຽນ​ຄຳ ​ພ້ອມ​ເງິນສົດ 5 ລ້ານ​ກີບ, ທີ 2 ຫຼຽນ​ເງິນ ​ພ້ອມເງິນ​ລາງວັນ 2 ລ້ານ​ກີບ ​ແລະ ທີ 3 ​ໄດ້​ຮັບ​ຫຼຽນ​ທອງ ພ້ອມ​ເງິນ 1 ລ້ານ​ກີບ.

ເປຕັງ ນາຍົກ1

​ໂດຍ ອ້ວນ​ດຳ  

    

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png